Ош облусунун Ноокат районундагы Кеңеш айыл өкмөтүндөгү Куу-Майдан айылы тоолу аймак болгондуктан жаз мезгили кечирээк келип, эгин айдап себүү эми аяктады. Негизинен биздин айылдын тургундары талаага буудай, жүгөрү, картошка эгишет.
Быйылкы жылы кайрак жерлерге буудай көп себилди. Андан кийин жүгөрүнү эгүү дагы аяктады. Жалпысынан алганда айылдын жыйырма гектар жерине жүгөрү эгилди. Андан тышкары картошканын жогорку түшүмдүү сортторун алып келишип, аны эгүүнү аяктайын деп калышты. Кээ бир айыл тургундары өздөрүнүн үлүштүк жерлерине пияз, помидор, сабиз, капуста көчөттөрүн отургузушту.
Дыйкандар мол түшүм алуу үчүн жерлерине көп жер семирткичтерди беришти. Эгип бүткөндөн кийин эгиндерге зыян берүүчү чөп басып кетпеш үчүн чөп өлтүрүүчү дарыларды чачышты. Биздин айылда жер айдоочу, эгип себүүчү техникалар көп болгондуктан өтө тез темп менен жазгы талаа иштери аяктап калды.
Даярдаган: Тинатин Коңурбаева