Шаңкол айылында жаңы арык каналы капиталдык ремонттон өткөрүлүүдө

Ош облусунун Ноокат районуна караштуу Кеңеш айыл өкмөтүнүн Шаңкол айылына жаңы арык каналы капиталдык ремонттон өткөрүлдү. Бул жаңы арык каналына Кенеш айыл өкмөтүнүн бюджетинин эсебинен 20000 сом акча каражаты бөлүнүп, ишке ашырылууда.

Жаңы арык каналына цемонт бетон куюшуп, канал кылышууда. Бул каналды жашоочулар өздөрү эле курушуп, кызмат акысына ун, май жана башка продукталарды алышууда.  Жашоочулардан 18 адам иштеп, ремонт иштерин жүргүзүп жатышат.



Шаңкол айылынын тургуну Акназар Алтыбаевдин айтымында» Бул каналдын ремонттон өткөрүлүшү бизге жакшы жаңылык болду. Анткени бизге суу өтпөй, жетпей калган болчу. Кеңеш айыл өкмөтүнүн адистерине рахмат ремонт  иштерин жүргүзүп бергендиги үчүн- деп сөзүн толуктады Алтыбаев».

Кеңеш айыл өкмөтүнүн Шаңкол айылынын айыл башчысы Абдыкадыр Жамгырчиевдин айтымында» Жаңы арык каналыбыздын капиталдык ремонттон өтүшүн биз көптөн бери көздөп жүргөнбүз, акыры ишке ашырдык деп айтсам болот. Жашоочулар 100 гектарга жакын жерде суу ичишет каналыбыздан, жашоочулардын үлүш жерлери бар, фондтуу жерлери бар, үй тамаркалары бар ошол үчүн 12 метр жерге латок фундамент куюлууда баардыгына ыраазычылык билдирем- деп сөзүн жыйынтыктады Жамгырчиев».

2019-жыл санариптештирүү жылында Кеңеш айыл өкмөтүнүн жетишкендиктери

  •  Ош облусунун Ноокат районуна караштуу Кеңеш айыл өкмөтүндө 2019-жыл  Кыргыз Республикасынын президентинин региондорду өнүктүрүү жана санариптештирүү жылы деп жарыялоосунун негизинде Кеңеш айыл өкмөтү жергиликтүү бюджеттин эсебинен, айыл өкмөттүн имаратына күзөт, камерларды орнотушту.

Ал эми жол транспорт министрлиги тарабынан жөнөтүлгөн каттардын негизинде Кеңеш айыл аймагынан өткөн Ноокат Көк-Бел каттамындагы, 12-13-чакырымына  жол каттамындагы транспорттордун ылдамдыгын көзөмөлдөө боюнча камералар орнотулду.

Кеңеш айыл өкмөтүнүн башчысынын орун басары Жеңишбек Исаевтин айтымында»Бул камераларды орнотконубуздун натыйжасында биздин аппарат кызматкерлерин ала турган болсок, алар өз убактысында жумушка келип, өз убактысында жумушун бүтүрүп кетип,  жана жумуш убактысында башка иштер менен алек болбой баардыгы жакшы иш жүргүзүүдө, тартип бир аз алдыга жүрүүдө жана ошондой эле кызмат көрсөтүүгө келген жашоочулар сыртта болобу, кайсы бир адисти издеп калабы,  баары  камера көзөмөлүндө болот,  камеранын мониторинги  айыл өкмөт башчысынын кабинетине коюлган, бул жетишкендик биз жана башкалар үчүн  жакшы жаңылык болду десем болот-деп билдирди Исаев».

Кеңеш айыл өкмөтүнүн имаратынын кароолу, күзөтчүсү Сейдалы Батыровдун айтымында» Кеңеш айыл өкмөтүнө коюлган камералардын пайдасы бул биринчиден мага бир жардам болду деп айтсам болот. Себеби айыл өкмөттүн имаратында Wi-Fi бар болгондуктан жашоочулар көп келип колдонушат ошол убакытта таштандыларды таштап, имараттын эшик, айнектерине тийишишсе камеранын жардамы менен билип алабыз-деп билдирди Батыров».

 

 

Мектептерде ремонт иштери кызуу жүрүп жатат

Ноокат районундагы мектептерге ремонтко керектүү болгон жабдуулар таратылып билим берүүчү мекемелерде ремонт иштер кызуу жүрүп жаткан учуру. Ремонтко кеткен каражат жыл сайын республикалык бюджеттен бөлүнүп турат. Мектептерди мугалимдер бөлүп алышып ремонттоп жатышат.

Мектептер жыл сайын окуу аяктагандан кийин бир жолу ремонттон өтүп турат. Мептептин негизинен арталары, стулдары, дубалдары, эшиги краскаланат, бузулган парталар оңдолот.

Мектептеги ремонтко жыл сайын бүтүрүүчү окуучулар 9-11-класстар жардамдашат. 600 окуучуга ылайыкталган Жапар Нышанов мектеби быйылда ремонт иштерин өз убагында баштады.

Башталгыч класс мугалими: “Биз жылда өз-өз класыбызды ремонттон өткөрөбүз, ремонтко жогорку класстын окуучуларын бөлүп алабыз, алар бизге жардам беришет.”-деп билдирди Болдукыз Кудайбердиева.

Автор: Курсантбек уулу Хусейн

«Beeline» Билайн ар дайым биз менен.

Ош облусунун Ноокат районунда лотерея оюну ойнотулду. Бул оюн «Beeline» компаниясы тарабынан уюштурулган. Лотерея болуп көрбөгөндөй, эң мыкты деңгээлде болуп өттү.

Бул лотерея Ноокат районунда биринчи жолу болуп жаткан жок, бул убакытка чейин дагы да болуп келген, билайндын кардарлары көп болгондуктан адамдар да көп келип катышып ойноп кетишти.

«Beeline» компаниясы башкы байгеге телевизор жана аны менен кошо үйгө керектелүүчү эң сонун баалуу белектерди коюшкан, эн кичинекей белектер ручка, наушник, блакнот, телефонго чехол ж.б.у.с буюмдар берилген.

Башкы байгени алган телевизордун ээси Тынчтыкбек Айылчиевдин айтымында «Мен азыр абдан кубанычтамын, толкунданып  турам. Бул бешене экен өзүмө өзүм ишене албай жатам. «Beeline» га, уюштуруучуларга ыраазычылык билдирип кетем ушул сыяктуу лотереяларды, оюндарды дагы да уюштура беришсин-деп билдирди Тынчтыкбек мырза».

Лотереяга катышуу үчүн адамдардын акчасы күйгөн жок болгону алар өздөрүнө жөн гана бирдик салышты. Эч нерсе чыкпай калган оюнчуларга суусундуктар таратылды. Катышуу үчүн адамдар билайндан бир симкарта алып ага 150 сом бирдик салышты. Андан кийин номерлер аркылуу ойнотулду. Оюн кызыктуу жана шаңдуу болду.

Оюндун катышуучусу Айдана Медетованын айтымында» Тилеке каршы мага эч нерсе чыкпай калды бирок ошондой болсо да мен күйгөн жокмун анткени мен жөн гана өзүмө бирдик салдым десем болот биздин үмүтүбүз кийинки лотереяларда-деп сөзүн аяктады Медетова».

Даярдаган: Айжибек Насиркул кызы.

Ош шаарынын так ортосунда жайгашкан Сулайман-Тоо

  1. Сулайман-Тоо Ош шаарындагы ыйык тоо. 2009-жылдын июнь айында ЮНЕСКОго катталган мамлекеттик биринчи эстелик. Узундугу 3 км, туурасы 1,5-2  км, деңиз деңгээлинен бийиктиги 1176 м. Салыштырмалуу бийиктиги  300-350 метр. Сулайман -Тоо улуттук тарыхый-археологиялык музей — комплекс. XVI-кылымга чейин Сулайман-Тоо Баара-Кух деп табылганы  маалым.

Тоодо 5 чоку бар:

1) Баара-Таг  (Сулайман-Тоо).

2) Шор-Таг (“Ак туздуу чоку” дегенди түшүндүрөт).

3) Рушан-Таг (“Эң бийик”, “эң жарык” деген маанини берет).

4) Ээр-Таг (“Ээрге окшош тоо”). Чокунун түндүк капталы көрүнүшүнө жараша Каттама-Таш деп аталат.

5) Кекилик-Учар.

Сулайман-Тоого киргенден түшкөнгө чейин 940 тепкич бар.Зыяратчылар үчүн табигый бир нече үңкүрлөр бар.Алар:”Эшен- Үңкүр”,”Кырк-Чилтен”,”Үр-Кыз”,”Бешик-Эне”,”Тамчы-Тамар” жана башкалар.

Тарыхы

Сулайман-Тоо Өзгөн канынын вазири Султан Мази Сулаймандын (XV-кылымдын башы) ысмынан аталган. Вазир Сулайман-Тоону жайкы резиденциясына айландырган. Жергиликтүү эл жана четтен келгендер тоого чыгышып, жөн гана сейилдешкен.Эл көп каттагандыгынан пайдаланып, дин кызматкерлери тоону тотемдик даражага жеткиришип, ислам динин таратуучу майданга (аренага) айландырышкан. Дин кызматкерлери Сулайман пайгамбардын тактысынын табылгандыгы жөнүндө сөз таратышкан. Өзгөн вазири Сулайман пайгамбарга, ал эми анын эс алуучу жайы Сулайман тактысына айланып, «ыйык» даңкка ээ болгон. Захридин Бабур тоого эс алып олтура турган жай (кужура) курдурган. Азыр чокусуна түтүк менен суу чыгарылып,айланасына бак-дарак тигилип, жашылдандырылып, эмгекчилердин эс алуучу жайына айланды. Боорунан үңкүр казылган. Түштүк Кыргызстандын тарыхы менен тааныштыруучу бир нече залдан турган өзүнчө оригиналдуу музей жайгаштырылды.

Бабурдун үйү

Тоонун чокусунда Бабурдун башкаруусунда пайда болгон «Тахты Сулайман» мечити жайгашкан. Атеисттер 1963-жылы Бабурдун үйүн буздуруп салышкан. Кийин 1991-жылы сакталып калган материалдардын жардамы менен бул тарыхый эстелик кайра калыбына келтирилген.

Музей

Музей архитектор Назаров Кубанычбек Кудайназаровичдин долбоору менен 1978-жылы курулган. Музей 2 кабаттан турат. Биринчи кабатында майда табигый буюмдар жайгашкан. Экинчи кабатка чыгып бара жатып, жан жаныбарлардын катырылган абалда турганын  көрүүгө болот. Экинчи этажында  дүйнөлүк диндердин, Фергана өрөөнүндөгү элдердин ырым-жырымдары жайланышкан зал болуп эсептелет.Бул маалымат экскурсовод Кызжибек Ташматова жана археолог илимий агартуу бөлүмүнүн башчысы Эмирлан Мырзабеков тарабынан алынды.

Ыйык жайлары

Бел таштан бели, бөйрөгү ооруган адамдар 7 жолу сыйгаланып түшүшөт. Ден соолугу начар, жашы өтүп калган адамдар 3 же 1 ирет сыйгаланууга тийиш. Маалыматтарга караганда, шыпаа тапкандар көп.
Кол таш деп аталган жайга сыйынганы келгендер ооруган колун салып, ичинен тилек тилешет. “Жакшылап көңүл бурган адам манжаларынын учу чымыраганын сезет” деп айтылат.
Бешик энеге балалуу болбой жүргөндөр көп келишет. Андагы көзөнөк ташты эки колу менен кармап, маңдайын ага тийгизип, ичинен тилек тилешет. Сыйынгандардын тилеги кабыл болгон мисалдар көп.
Хуркызга кыз-келиндер барышат жана өзүлөрүнүн аруу-тилектерин айтышып, жараткандан аларды ишке ашыруусун суранышат. Эркектер сыйынуучу жай «Кырк-Чилтен» деп аталат. Уламышта бул үңкүр – жигит пири Шаймерден түнөп кеткен ыйык жай. Жоокерчилик заманда жоого аттанар эр-жигиттер ошол жерге барып сыйынышчу экен.

Сулайман-Тоо мечити

Сулайман-Тоо мечити арабдар жана элдин колдоосу менен курулган.Мечит 3 кабаттан турат жана 4 мунарасы бар.Мечит 5000 ден ашуун адамга ылайыкташтырылган.Мечиттин курулганына 10-жылдай убакыт болду. Жума күндөрү мечитке жума намазын окуганы 5000ден ашуун адам келет.Мечитте негизинен 5 имам иштейт.Мечиттин азанчысы:Нажибулла Айдаров.Бул маалыматты  мечиттин имамдарынын бири Бахрам Абдуллажанов айтып берди.

Жайкы эс алуу мезгилинде күнүнө 1000 ден ашуун элдер эс алып,зыярат кылганы келишет.Сулайман-Тоо Кыргызстандагы эң ыйык жайлардын бири болуп эсептелинет.

Төмөндөгү шилтеме аркылуу тесттен өтүп, өзүңүздү сынап көрүңүз.

https://www.playbuzz.com/item/0d91ab9b-d2b0-4e5e-ad9b-9ba95a42a422

Даярдаган: Кожоева Асылкан, Мурзаш кызы Нурзада, Курсантбек уулу Хусейн, Жалалова Таңнуру.

 

Улуу Ата-мекендик согушка 74 жыл

Ош облусунун Ноокат районуна караштуу Кеңеш айыл өкмөтүндө Улуу Ата-мекендик согуштун 74 жылдыгы белгиленди. Бул мааракеде айылдын аксакал аталарыбызды коноктошту.

Улуу Ата-мекендик согуштун катышуучусу болуп бир гана Мекенов Абдилла атабыз бар экен жана андан сырткары улуу муундагы чоң аталарыбызды, аксакалдарды чакырып салтанаттуу маареке өткөрүлдү. Аксакал аталарыбызга орозого туш келип калгандыгына байланыштуу иптарлик берилип,  Ж. Нышанов, Шаңкол, жана Дары-Суу орто мектептери концерт коюп беришти.

Кеңеш айыл өкмөтүнүн башчысынын орун басары Жеңишбек Исаевтин айтымында»Бугун биздин Кеңеш айыл өкмөттө чоң иш чара болуп өттү деп ойлоймун. Бул иш чара Улуу жеңиштин 74 жылдыгына арналып жалпы айыл өкмөтүндөгү согуштун ардагери Абдилла абабыздын жана ошондой эле тыллдын катышуучуларынын катышуусунда өткөрүлдү.

Бүгүнкү күндө бизге жакшы жашоо тартуулап, өз жанын аябай кызмат өтөп келген Абдилла абабыздын катышуусунда чоң иш чара өткөрүлдү. Бул иш чарага афган согушунун ардагерлери, медицина тармагынын адистери, айыл өкмөттүн өкүлдөрү, почта кызматкерлери, учаска инспекторлору мектеп окуучулары катышып беришти.

Иш чарага тыллдын катышуучуларынан 45 ардагер чакырылып алардын кээ бирлери ден-соолугуна байланыштуу келбей калып үйлөрүнө продукталар таратылып берилди, келген катышуучулардын колуна белектер берилип жакшы маанайда тосуп узатышты. Бул мааракеге айыл өкмөт тарабынан 30 миң сом акча каражаты бөлүндү. Жана ошондой эле маараке аяктаган соң курман болгон аталарыбызга куран окулду.

Даярдаган: Айжибек Насиркул кызы

 

 

 

 

Жаш таланттын алгачкы кадамдары.

Ош облусунун Ноокат районуна караштуу Кеңеш айыл өкмөтүнүн Куу-Майдан айылындагы Жапар Нышанов атындагы орто мектебинде көңүлдүү, эң бир сонун концерт болуп өттү.

Бул концертти жаш таланттын алгачкы кадамдары деп  атап койсок болот себеби дегенде Ж. Нышанов мектебине ушул концертти Замир Байматов аттуу жаш, таланттуу жигит уюштуруп көңүлдүү маанайда жакшы өткөрүп алды деп айтсак да жаңылышпайбыз. Жаш таланттын сахналаш достору жана карындашы  келип Замирдин ийгиликтери үчүн жардамдарын көрсөтүштү.

Замир Байматовдун айтымында «Менин негизги максатым жакында Казакстанга конкурска барам, конкурска катышышым керек. Кыргызстанда Ноокат району боюнча мени тандап алышты. Буга чейин кайрымдуулук концерти боюнча бөлүп калышыптыр ошентип ар кайсыл жерлерде 1 ай ырдап, иштеп жүрдүм десем болот. Ошондуктан мага Ноокат районунан конкурска барсаң өзүңө бир аз иштеп ал деп руксат кагазын берди-деп билдирди Байматов.

Администратор Марскан Табышбекованын айтымында «Биз ушул Ж.Нышанов атындагы мектепте турабыз, себеби өзүңөрдүн жердешиңер Замирдин тушоо концертин өткөрүп жатабыз бул концерт дагы көптөгөн мектептерде болду. Менин колумдан И. Абдразаков, Т. Колдошов, Замир Мырза ж.б көптөгөн менмин деген белгилүү ырчылар чыккан буйруса Замирди да ошолордун катарына кошобуз деген жакшы ниеттер бар»-деп билдирди Табышбекова.

Көрүүчү Мадина Камчыбек кызынын айтымында «Мен бүгүнкү концертке киргениме абдан кубанычтамын, көңүлдүү жакшы маанайда өттү. Биз берген билет акчасы 30 сом жөн эле жок болуп кетмек, баарына ыраазычылык билдирем»-деп сөзүн толуктады Камчыбек кызы.

Даярдаган: Айжибек Насиркул кызы.

 

 

 

 

 

 

 

 

Китеп кербени.

Ош облусунун Ноокат районуна караштуу Куу-Майдан айылынын Жапар Нышанов атындагы орто мектебинде китеп кербени болуп өттү.

Бул кербенге мектептин китеп окуганга кызыккан көптөгөн мугалимдери, окуучулары катышышты жана кызыктуу өттү. Кербендин негизги максаты китеп окууга кызыктыруу ошондой эле китеп окуу менен бирге окуучулардын аң сезимин, дүйнө таанымын өстүрүү болду.

Долбоордун өкүлү Гүлсана Нурлан кызынын айтымында»Азыркы мезгилде окуучулар китепке  көңүл бурбай, көп окубай калгандыктан биз ар бир мектептерге ушундай семинарларды өткөрүп жүрөбүз. Балдар китеп окуганда чарчап калбасын деп жеңилирээк китептердин топтомдорун алып келип, арзан баада сатып жатабыз. Каалоочулар көптөгөн китептерди  алышып мындай кийин дайыма китеп окуп жүрүүгө аракет кылабыз дешти. Бул кербен мындай кийин да башка мектептерге  улана берет»-деп билдирди Нурлан кызы.

Кербенге катышкан окуучу Айзат Медетбек кызынын айтымында»Мен бул семинардан өзүмө көптөгөн жакшы нерселерди алдым. Себеби, ушул маалга чейин китеп окуп жүрсөм, мындан кийин дагы китепке болгон кызыгуум өстү десем болот»-деп билдирди Медетбек кызы.

Даярдаган: Тинатин Коңурбаева

Китеп окуу лагери.

  1.  Ош облусунун Ноокат районуна караштуу Кеңеш айыл өкмөтүнүн Куу-Майдан айылындагы Жапар Нышанов атындагы орто мектебинде бир күндүк «Китеп окуу лагери» болуп өттү.

 

Китеп окуу лагерине каалоочу окуучулар катышышты баары биригип 60ка чукул окуучу болду, саат 9:00 — 17:00 гө чейин сабак  өтүлдү, катышуучулар 50 сомдон акча берип киришти, себеби алар акчаны окуучулардын түшкү тамагына сарпташты. Окуу жогорку деңгээлде болуп өттү.

Кыргыз Республикасынын президентинин аппаратына караштуу «Ыйман» диний маданиятынын өнүктүрүү фондунун, түштүк аймагы боюнча өкүлү Нургазы Нурлан уулунун айтымында » Китепти өнүктүрүү долбоорлордун негизинде Ноокат аймагындагы Ж. Нышанов мектебинде  турабыз, бул долбоор 2015-жылдан бери ишке ашып, бардык түштүк аймагында, мектептерде китеп окуу лагерлери уюштурулуп жатат.

«Ыйман» диний маданиятынын өнүктүрүү фондунун дагы бир өкүлү Гулсана Нурлан кызынын айтымында » Китепкөй улут долбоорунун негизинде келдик, китеп лагери бир күндүк эртеден кечке, атайын окуучулар үчүн 6-класстан 9-класска чейинки окуучулар катышышты. Биздин максат балдардын мектеп курагынан баштап китеп окутуу, китепке кызыктыруу болду-деп билдирди Нурлан кызы.

Программа тартиби:

1. 30 мүнөттүк китеп окуу.

2. 2,5 сааттык семинар.

3. Кофе печенье берүү.

. Таасирдүү видео ролик.

4.Түшкү тамак.

5. Ачык асманда китеп окуу.

6. Топко бөлүнүп жарышуу.

Китеп окуу лагерине катышкан  окуучу Гулиза Исамидин кызынын айтымында «Мен бүгүнкү иш чарада өзүмө абдан чоң таасир алдым десем болот, убакытты кандай пайдалануу,  максатты кандай коюу керектигин түшүндүм, ушул иш чарага катышканыма абдан кубанычтамын»-деп билдирди Исамидин кызы.

Даярдаган: Айжибек Насиркул кызы.

 

 

 

 

 

Физика ааламга жол ачат.

Ош облусунун Ноокат районуна караштуу Кеңеш айыл өкмөтүнүн Куу-Майдан айылындагы Жапар Нышанов атындагы орто мектебинде «Физика ааламга жол ачат» деген темада иш чара болуп өттү.

Иш чарага  7-а жана 7-б класстын окуучулары катышып өз сыйлыктарын алышышты. Окуучулар бири-бири менен жарышып окуудагы ийгиликтерин сынашып, жагымдуу маанайда катышышты. Алар эле эмес бүт мектеп окуучулары эң сонун маанайда болушту.

Программа тартиби:

Чоңдуктар бийлешет.

Хор ыр ырдоо.

Физикалык табышмактар.

Физикалык фокустар.

Өткөн темалардан суроо-жооп.

Физика боюнча макал-лакаптар.

Окумуштуулар боюнча легендалар.

Уюштуруучу физика мугалими Мубара Кадырованын айтымында «Физикалык адабий кече өткөрдүк, бизге эле эмес баарына жакты деп ойлойм, окуучулар «Блок» жана «Статика» деп эки топко бөлүнүп жарышышты, себеби биз азыр ушул темаларды өтүп жатабыз, окуучулардын эсинде калышы үчүн ушундай иш чараларды өтүп жатабыз»-деп билдирди Кадырова.

Катышуучу Мадина Кудайбердиеванын айтымында «Физикалык адабий кече бизге аябай жакты, биз абдан катуу даярдандык, күчтүү жеңет эмеспи ошондуктан биз «Блок» командасын жеңип абдан кубанычтабыз»-деп билдирди Кудайбердиева.

Даярдаган: Айжибек Насиркул кызы.